[正港遊] 萬宜水庫 + 浪茄灣

冇得出走香港咪香港遊囉
反正呢個城市好多特別嘅地方
(嗱~ 我唔係剩係去旅行同宅响屋企㗎)
終於唔係非常熱,行吓山都唔錯
輕輕鬆鬆去就近嘅西貢比較方便

入到西貢市中心
飲完茶搭的士去萬宜水庫東壩
有好多人會掉返轉
先行入去再搭的士出
但係香港啲的士好大部份都好hihi
明知犯法都會markup
然後又冇計啦焗住唔搭又唔得
所以都係建議搭入去再行返出嚟
至少嗰程的士一定係跟錶跳冇得呃
係㗎喇唔係話俾人哋賺多少少都唔得
咁無啦啦點解要俾人屈錢仲要理所當然啫
尤其佢哋啲死人態度仲要差到無倫
條氣係唔順㗎喇汝吹得吾脹乎?

好,唔講咁多負面嘢開開心心行下山...
落的士之後向下行落東壩
沿路就見到火山而成嘅六角形岩柱
超近距離就睇到世界級景觀
啲柱堅係歷史嘢
有1億4000幾萬年咁㗎!
仲有世界稀有嘅扭曲版嘅岩柱
個S形態係因為受地震同區域性下沉影響
碌柱最脆弱嘅部份會裂開
然後啲地下岩漿就入侵嗰啲裂縫位
啲岩漿冷卻之後,形成灰色岩牆
入侵者比原本嘅細4000萬歲
都有成億年嘅歷史喇
睇到啦,入侵者就係入侵者
就算過咗幾多年後世嘅人都係會見到㗎!
兜到落嚟行過對面就係海蝕洞
顧名思義係俾海水侵蝕啲岩柱而形成
btw,點解啲人要咁弱智噴花啲石呢
完全唔覺得咁樣做有幾威威囉
噴得靚都話啫(大誤)
兜返出嚟,冇乜水
上返去萬宜路,就會見到破邊洲
成忽地俾海水蝕到落底
變咗漏條罅出嚟咁
望真啲佢個剖面都係一坑坑㗎
由萬宜路睇返去啲六角形岩柱真係好宏偉
一直剷上去向浪茄灣方向行(麥理浩徑1,2段)
都有一大排六角形岩柱
而個萬宜水庫啲色真係好靚
不過相比跟住落嚟嘅浪茄灣都仲係爭少少
浪茄灣
係咪呢係咪呢
白沙同清海水真係靚到喊
唔玩水齋睇海都好舒服
就算個肚唔餓都要休息吓補充水份同糖分
加上呢個地方真係好relax
坐低飲返杯就最好(嘻)
休息夠就離開浪茄灣(cya)
體力滿滿喇就開始回程嘅長征
byebye東壩(揮手)
一直沿著萬宜水庫周邊嚟行呀行
唔係齋行同只係睇水庫㗎
另一邊都仲有其他灣嘅
話晒呢條係麥理浩徑1段啦
行吓行吓,就到咗萬宜水庫西壩
冇咩做嘅話就咁望出去都幾舒服吖
最後,行到嚟麥理浩徑嘅起點
就係今次行程嘅終點
返巴士 or 綠van出西貢市中心就OK

慢慢行慢慢睇咁就玩咗半日


今次啲相啲色有啲差
大晴天加啲霧霾啫其實
不過唔記得帶相機
只係用部弱雞影相功能嘅手機嚟影
已經好盡力地係咁意執色㗎喇(冇矛盾)
是但啦,下次先影得好啲啦~~~

Comments