[濟州,맛있어요] Day1:西歸浦 서귀포

作為「假期乞兒」嘅我
要請最少嘅假去玩盡啲呢
red-eye flight係當然嘅首選

凌晨上機清晨落機
再搭機場巴士600號
由北面嘅機場(한국공항공사)
到南面嘅西歸浦서귀포
咁就好開心咁由日玩到夜

掉低行李梗係先去食嘢
但係原來呢個西歸浦每日偶來市場
서귀포매일올레시장 
係晏晝到好夜先係高峰期
即係,朝早八九點係冇咩嘢
不過冇還冇,要食嘅都有
呢個少少甜嘅오메기떡 @할머니떡집 
要嚟早餐真係啱啱好
原味豆粉就食得出舊米糕嘅草香味
店家婆婆每日鮮包鮮做
全部糕都係爆煙韌
裡面紅豆蓉唔會好甜
而紅豆粒嘅紅豆係硬硬地嗰種
同煙韌嘅糕質地有好大對比
最最最好食一定好首推mixed nuts
啲果仁香到癲又夠脆
哇!真係好食到震~~~
好喇,市場啲舖好多都响未開同準備中之間
去吓今個trip唯一嘅景點先
(冇錯!呢個trip實際上又係只得食啫)
出市場之後就係李仲燮藝術街이중섭거리
對佢啲嘢冇乜感覺同認識
兜過就算喇,反正係咪都要經過…
呀,weekend有藝術市集嘅
不過啲嘢唔太吸引我
沿著海邊行,好L大風
唔向海望就係向山
漢拏山한라산)係韓國最高嘅山,就咁。
好喇行到checkpoint:正房瀑布정방폭포
特登嚟睇㗎!
佢係亞洲唯一直接流入海嘅瀑布
一啲都唔宏偉㗎
只係佢比較特別咋
加上呢度超近下一個食嘢嘅地方
so,就算呢樹有海女即捕即解嘅海鮮都冇試
brunch @風車雞海鮮鍋풍차닭해물탕
黐孖根㗎勁大兜囉(傻眼)
帶子個殼係我隻前臂咁長
然後裡面有蝦有蟹有八爪魚
有大量嘅蜆同青口
仲!有!半!隻!雞!
湯底要滾滾吓咁
因為係有十二種藥材响裡面
連埋海鮮呀雞呀咁一齊滾
個湯又甘又甜咁好好味
當然唔少得另一種甜味
嚟濟州梗係要飲吓呢度嘅濟州柑makgeolli막걸리
呢隻有淡淡柑味米酒味出啲

...食完慢慢行返去酒店check-in
跟住就殺落HomePlus
係㗎喇,不嬲都係介乎去食嘢同買嘢食咁㗎啦
晚餐就走去食濟州黑牛 @흑한우명품관토평동수국길
炭~ 火~ 燒~ 牛~
有牛扒同胸腹肉
(想嗌排骨但係佢呢度得調味排骨要食原味嘅我就冇嗌到喇)
牛嘛… 味道當然係超香
呢間啲牛肯定地新鮮
因為係每日先劏冇雪過嘅牛
韓牛冇和牛咁肥,肉味濃啲啲
就算個樣好多白色睇落好肥嘅胸腹肉
燒完食落都唔會好肥漏漏
仲要佢耐燒啲,個脂肪位燒到脆卜卜咁
肉位又唔會太乾,好好味呢~
今晚飲有汽嘅傳統濟州makgeolli
전통 제주 막걸리 생유산균
呀呀呀~ 呢隻好好飲
米味香甜仲要有汽,好似飲汽水咁
但係又有微微發酵氣味,好正呢!
一日嘅結束係唔可以遺漏宵夜呢樣嘢
不過食完牛飽飽地
食個甜品就夠喇
响便利店買咗杯好可愛嘅紅豆刨冰
紅豆軟綿綿刨冰 x 心形濃滑牛奶雪糕 x 煙煙韌年糕
杯嘢仲唔會好甜唔錯唔錯


好喇,玩完一整日係時候休息吓
聽日再去食食食過~

-----------------------------------------------

延伸閱讀:

Day1:西歸浦 서귀포
Day2:西歸浦 서귀포 ⇋ 中文區 중문관광단지
Day3:西歸浦 서귀포 ⇀ 濟州市 제주시

Comments