光 · 影 · 香港夜 | Lumieres Hong Kong

將里昂嘅Fête des Lumières概念帶嚟維港兩岸
香港本身已經好夠光
咁再加好多好多燈落去
究竟會唔會睇到散光突然加深呢?
作為一個九龍人當然係從尖沙嘴出發
先嚟張流到喊嘅趕客artwork
半島酒店嘅「九龍飛剪 | The Kowloon Clipper
by 何兆南 South Ho
以水上飛機為奇想
話好幽默咁* 整咗個"Boarding 登機中"時而"Final Call最後召集"牌棟响度
(*睇booklet先知咋,唔睇真係唔知原來係幽默嘢囉come on James)
令到行到嚟嘅人都「吓」咗聲...
話說嚟半島呢個checkpoint
係因為睇到呢張地點相
以為型到可以唔長曝光都可以影到咁
well,現實係...
下一站,都係流流地
地點係1881 Heritage
作品「舊燈塔的記憶 | The Memories from the Tower of Light
by 王志勇 Wong Chi Yung
呢座前水警總部外牆曾經有白鴿籠
所以做咗個籠形裝置
然後用光影返啲唔!知!乜!出嚟
睇咗好耐,真係唔知係乜
加上啲黑色一條條差唔多遮晒啲影像
總之係睇出嚟啲嘢變成郁郁吓變吓色嘅嘢咁啦...
好!去鐘樓睇返啲識睇又有得玩嘅嘢
用咗個水池同鐘樓結合嘅裝置
鐘樓歷險 | Long Striker, the Light Keeper
by Benjamin Petit (LTBL) x Salvatore Barletta (Vendredi 4)
由水池到鐘樓頂就等於一條... 龍!
佢家下白色衫
又變返綠色衫
又變返__色衫,驟眼望吓好似綠色衫
呢個裝置係可以去條龍尾度玩㗎
大力士揼鎚仔遊戲
1-7分係普通嘢
8-9分先有晒成條動畫睇
輪到我玩喇喇喇
個鎚仔好L重...

幾多分呢幾多分呢
哎吔吔,5分咋多謝參與

~ 好喇,搭小輪過中環繼續睇 ~

落船行天橋已經望到大會堂個今次活動logoartwork
不過就俾周圍大廈啲燈搶晒fo
E-motion」by Yves Moreaux
諗住行埋去睇會好啲
點知附近啲樹呀街燈呀仲遮得犀利
因為係影落個牆身到
睇唔得晒其實好影響欣賞整個構圖囉
都幾失望㗎...
但係隔離個郵政總局就正好多
Anooki 反轉香港 | The Anooki shake up Hong Kong
by Moetu Batlle & David Passegand (Inook)
响郵局度梗係先用郵票做背景
Anooki俾風吹走喇
快啲用大廈啲窗口嚟捉實啦
利用光影製造牆身陰影將直線變曲線
再成為Anooki嘅彈彈線
哎吔吔,幅牆踩爛晒喇
佢哋由細變大大隻
大團圓結局嘅大合唱跳起yeah時間
好開心嘅動畫
有啲小朋友都跟住啲Anooki跳舞(唔係我呀!)
然後經過干諾道中行人隧道
就有名為「香港時光隧道 | The Time Machine」嘅展板
大大舊相同埋啲字嘅燈箱
令唔算太闊嘅行人路變得更窄...
然後去到香港文華東方酒店
LUX, An Experience
by 科視 | Christie
佢個牆身係有得玩影完相掉上去
唔知邊度影呀,冇玩到
(無殘念嘅... 我咁驚樣衰,將個樣放到咁大嚇親寶寶㗎嘛)
過埋條馬路就到咗皇后像廣場花園
見到一條條插响水池嘅光管
插呀插
幾個池都有啲咁啦
去返主池,光到盡見晒底就唔靚喇
個主題係「竹子廣場 | Bamboo Square
by Digiplay Christophe Mayer
用光管演化成竹咁
周圍播住啲風聲樹葉沙沙聲同雀仔聲
硬要你感覺到竹林深處人渣咁
不過啲光管真係好L刺眼
入唔到戲囉我sorry
啲光時光時刪
但刪嘅時間好短
反正我一向都唔鍾意光管
仲係白光呢種(!)
都係暗啲舒服啲...
行過啲就到「光· 影村 | Lumieres HK Village
呢個event嘅主題樂園
座落晌遮打花園
有一排消費嘅地方(同表演場地)
咁就係人都知啲電係邊間公司sponsor啦可
潮語霓虹燈
嚟多個

然後... 覺得冇咩特別就走咗
(冇留低睇表演)
之後發現原來呢度係有個「關於海的歌 | Over the Ocean」嘅artwork
呃呃呃呃呃

向上行,到咗前法國外方傳道大樓
(The Rormer French Mission Building)
抬頭就見到啲窗透到啲金魚出嚟
作品名係「魚缸 | Fish Tank
by Stéphane Masson
親身睇先睇到,相唔出個神髓
就咁睇只係似一啲藍藍橙橙嘅光
向西行到都爹利街
成條樓梯變咗昆蟲森林
你將會看見的... | The next thing you will see
by Map Office
個點影都影唔到嘅燈條係似一筆過畫嘅蚊一隻
(有個細路話係蜻蜓喎)
走入森林,就係一直播住啲昆蟲飛飛吓嘅聲
煩擾嘅程度係要揞實對耳仔
但真係好大聲
簡直係想踢晒啲人落樓梯發洩!!!
入咗去就想快啲走
如果唔係我可能真係有想殺人嘅衝動

上完樓梯繼續向西
有個叫「乙太の光 | Quinessence」嘅裝置
佢响蘭桂坊露天劇場
不過一來蘭桂坊一帶真係多人到塞唔到入條路
二來响booklet望到件嘢都唔太吸引我
直接skip啦再做一個向西西西邊行嘅女人

PMQ喇,就有呢個「日心說 | Heliocentric」嘅裝置
by 林欣傑 Keith Lam
可以走入去影相嘅
完全唔明白件嘢想講乜
唉,藝術呢家嘢我真係識道光
(然而道光係件歷史嘢,清朝嘅!)
去到最後一站:文武廟
有人表演嘅「缺 · 圓 · 夢 | The Void. The Fulfilment. The Dream
by 洪強 Hung Keung
個小劇目係大觀眾去過夢幻旅程咁
好,完場喇
收工!

一共十六個裝置
除咗頭先見到錯過同遺漏嘅
其實仲有唔知點解睇唔到嘅愛丁堡廣場棵「願望樹
同埋完全唔就腳嘅D2 Place嗰個「The Undiscovered World

個節目今晚仲有㗎,到十一點就熄燈。
最!後!今!晚!喇!
同里昂嘅Fête des Lumières一樣
都係一連三晚嘅
襯差唔多天黑好出發喇
咁就可以睇多啲囉~

話說同身邊嘅人講都冇人知有呢個event
真係唔知個政府做咗啲咩宣傳
其實佢哋有俾好多錢買電視廣告平面廣告咁
仲要有個叫劉嘉玲嘅大使
不過聽講個廣告係啲人睇完都唔知噏乜
所以根本唔會留意到呢件事
即係咁,又唔係話個女人趕客嘅
但係如果係我見到嘅話(因為我冇睇電視)
肯肯定唔會因為見到個女人而令我有興趣睇呢個活動
頂盡係以為電視台開咗個有佢份做嘅電視節目囉
唔會知道原來係一個响街睇嘢嘅event
講真唔係十成關個女人事嘅
係個廣告概念本身寫得唔好完全帶唔到個主題出嚟啫

碎碎念時間完畢
個event唔錯㗎
今晚有時間記住去睇吓玩吓喇~~~

Comments