Burberry 紅黑格仔手巾

紙巾呀抹手紙真係好方便
抽一抽抹一抹乾手淨腳
然後呢張紙咁嘅物體
佢嘅使命完成
伴隨著係生命完結

直接入堆!填!區!

e?乜佢唔係紙嚟㗎咩?
唔可以回收㗎?

係呀!紙巾係冇得回收再造
所以用過嘅紙巾只係件純垃圾
話說今日係無紙巾日
不過就算係咪呢啲日子
我都會帶住手巾

奢華感足帶啲虛榮感嘅Burberry
大大條正方形輕薄類型
多位抹易摺得細而且快乾
一用就用咗十幾年
平日都係掉去洗衣機度洗㗎咋
咁多年啲色呀線呀都冇點走

除咗抹嘢之外
有時會拎佢嚟包嘢
就咁包就用少好多細膠袋

唔知由幾時開始
就變成帶手巾嘅只係BB小朋友幼稚園生
其實從細細個唔係已經知道
抹嘴抹手就要用手巾仔㗎喇咩?
人大咗就失晒憶呀?
抹手紙仲要有唔少漂白劑化學劑
用得多都唔肯定會唔會對皮膚有冇傷害
(見啲同事成日整濕張抹手紙直接放上飯面叮飯其實覺得好恐怖)

就算做唔到對世界有偉大貢獻嘅人
都至少做一個善良嘅人
唔好一直破壞自己生存嘅地方
對自己都好啲吖~

如果冇帶手巾嘅習慣唔緊要
Never too late㗎
由今日起就搵返條手巾
用少張紙巾啦!

Comments