(In)tangible Reminiscence | 觸到的回憶

用展覽去留住式微行業嘅片段
(In)tangible Reminiscence 觸到的回憶
觸得到,因為個主題係紡織品
即係平日最親膚嘅衫褲襪啦
由港日韓三地藝術家展示三組展品
擺最近出入口嘅呢組
係來自日本嘅藝術家岩崎貴宏嘅作品:
左邊白色嘅係《混亂以外(變遷)》
Out of Disorder (In Flux), 2018
右邊黑色响牆身嘅係《星座(香港)》
Constellation (Hong Kong), 2018

以「變遷」為題材
係呢位藝術家嘅常見項目
雖然驟眼睇落得一隻色,好似冇咩嘢咁
但細心睇就發現有好多detail位
先由頭頂望起
會見到個白色嘅魚網
代表香港係由一個漁港開始
响魚網吊落嚟嘅白色線
一直行由前到後睇
先係好密好密...
(out-fo 更有意境,睇落去就知)
...行到後面就排好疏喇

get唔get到?係落雨呀!
即係前面有幾大雨
最後都會停㗎

上面啲魚網同雨好易會留意唔到
因為中間啲布條實在太吸睛
會將成件事只係停留响呢一度
成件作品除咗個魚網
其他全!部!都!係!用!棉!造!
而魚網代表漁港
然後就到呢啲起重機
城市,開始發展、建設中...
啲樓呀大廈工廠起到咁上下
唔係再工業為主
就演變為成行成市嘅商舖
落雨嘅下邊就聚集成雲

雨,係從密雲中落下
白線都係由棉花做
雲層都有好多建築物㗎!
呢啲咁精細嘅雕塑
唔係3D print呀膠呀嗰啲
係藝術家用棉線加埋強力膠水整
地下啲棉花雲都唔係亂咁砌
行返遠少少望
佢係港島地勢圖嚟㗎

哇~ 好精彩嘅作品!
黑色底白點點嘅「星座」圖
其實係香港嚟㗎
仲好搞笑咁好多位係有品牌logo組成
next,係香港藝術家Sarah Lai嘅作品
《穿過夜幕的襯衣》
Slide Through the Curtain of Night
80後嘅佢,對於紡織品
係來自佢媽媽帶佢去百貨公司到睇衫
所以佢就將以前全盛時期嘅百貨公司(節錄)
帶到嚟一齊分享

入百貨公司前會先望到個大櫥窗
喔!係戴著闊邊帽嘅model(shiseido廣告)
幅油畫叫《卡蜜兒》Camille
要經過門簾先可以入去呀
而家啲舖已經唔會再有呢種魔法門喇
連地板都係當時好興嘅大理石地板
(係啦呢塊係貼紙啦~)
《莫妮卡》Monica
就算得半忽面但係你咁靚女我唔會認唔出你啦
邱!淑!貞!(心)
呀~ 幅畫嘅闊邊帽唔係油彩係布呀
終於進入買衫嗰度喇
有衫架有試身室
仲有俾貴賓坐低慢慢休息睇雜誌嘅counter仔
啲衫係藝術家落深水埗揀布
再搵人縫製返80年代嘅時裝款式
試身室頂係以前條鐵U字形
三面掛住遮擋布嗰種
揭開布入到去
見到第一幅《莎莉 & 莎莉》Sally & Sally油畫
同圓邊帽,呢種帽以前响百貨公司
揸𨋢姐姐頭頂必見呢
另一幅《莎莉 & 莎莉》Sally & Sally
就擺响counter個雜誌架度

畫後面仲有而家冇可能見到嘅香煙廣告
(不過我呢度係「無煙網站」所以唔會出相)
入去呢個布幕後
就係韓國藝術家鄭然斗 (정연두) 嘅作品:
《穿高跟鞋的少女》
A Girl in Tall Shoes, 2018
video有兩個大屏幕,片長50分鐘
左邊係共4位23歲嘅香港女仔自白環節
右邊係曾經23歲嘅婆婆車刺繡字嘅過程
而5位嘅共通點... 係矮。
織布機刺繡嘅作品有4幅
就係個viedo車字嘅製成品
係講婆婆23歲嗰陣嘅事
由佢23歲偷渡南下嚟香港...
點樣去到工廠做嘢...
寄錢返鄉下俾阿爸阿媽...
住邊、拎身份証... 結婚...
...到管理織布車以至高踭鞋
係婆婆當年嘅歷史啊
唔係寫,直頭車進日記簿!

好有人性嘅一份作品。
今次係CHAT(六廠紡織文化藝術館)
最後一次响中環南豐擺展
(張貼紙係參加導賞團貼俾我嘅)
過多幾個月就可以去活化完嘅荃灣南豐喇
喔!睇完展仲有紀念品拎走
係攜帶式針線包啦
貫徹紡織文化嘅形象呢~

Comments