浮世絵調原画展 | Modern Art Of Floating World

浮世絵 - 源於17世紀嘅日本畫風
用色同風格都好獨特
直到而家嘅日本
都仲有大多數嘅傳統紋身師
要學習一定程度嘅浮世絵之後
先可以夠資格去幫人紋身
然而當代藝術得以承傳
梗係唔少得新舊交融呢個階段
噏完一輪無聊嘢,入去喇... 終於~(嘻)
有幾位artist嘅作品
雖然都係浮世絵但係畫風好唔同
幽默感十足嘅一系列畫作
去澡堂玩嘅美人圖
點解係玩?有水槍有黃色膠鴨仔
一路睇一直忍唔住笑咗出嚟囉
著nike食抹茶扭紋軟雪糕同扮聖母
玩得幾盡吓喎老細,哈哈
响浮世絵中廣為人知嘅一幅
葛飾北斎嘅《神奈川沖浪裏》
藝術家當然唔會放過
硬插個驚訝表情嘅美人落去
不過唔算好突兀嘅
個比例同張大千幅《黃山自畫像》差唔多
左右作品的畫完全唔同感覺
冇錯!進入下一個畫家嘅作品
右邊嗰幅連顏料都好獨特
經相片其實唔係好睇得出佢有幾金
好明顯呢位畫師好鍾意玩合體、龍同埋鬼
同一位畫師
佢除咗以人體(紋身)同雕版轉印畫紙為媒介
當代嚟講,滑板都係佢嘅創作範疇
啲板真係型到震!
然後就係poster上面嘅figure
將浮世絵硬接金魚
赤鬼(後面個盒係畫師嚟現場即畫㗎)
青鬼
呢隻個身嘅顏色似ふぐ多啲啫...
有樹脂雕塑先嘅
呢批畫係之後再畫返
最後呢輯,又覺得好好笑嘅
呢位畫師本身係上班族
之後走去咗做紋身師
所以會(要)畫浮世絵
左邊嘅係畫人形、crossover高達嗰啲
右邊就係上班族嘅日常
又係一路睇一路笑again
唔係揸劍係拎住百円店透明遮;
仲要用呢把透明遮乘風破浪咁通勤去;
有侵侵打golf,個波係北韓旗;
golf棍响盛怒之下會想用嚟打爆個電腦;
上班族碌碌手機都係打golf game
另一邊有邊食邊趕返工嘅上班族;
去七十一 (個膠袋用橙紅綠寫住漢字七十一)食便利店嘢解決lunch;
工作作戰指揮部;要跑數嘅打工仔...
喂呀!一個二個古代樣再配埋而家啲嘢
差啲笑到我眼水飆囉(笑喊)
嘿嘿嘿,打工仔做到死唔出奇吖~
食煙?抵你死!
既喜歡浮世絵又鍾意幽默嘢嘅我
覺得個展覽實在太過癮
完全係驚喜,不愧山長水遠咁隔涉到要死嚟睇!!!

Comments