慢理牆城 Wall Is Eat

因為食評榜排位高所以月巴HIM拉我去試吓喎…
間嘢位於M1酒店1樓
鄰國人入住嗰啲咁啦
所以地面lobby係絕對可以用恐怖嚟形容
餐廳樓底極高裝修都唔錯
至少唔似置身於油麻地旺角
而啲枱細細張間距又超窄可以好清楚聽到隔離枱傾緊啲咩
(一邊嘅隔離枱勁講旅行,好想join埋一齊講)
house water係檸檬蝶豆花茶
話加咗檸檬飲都有檸檬味
不過好神奇個色都仲係藍色而唔係紫色
hot dish係水牛芝士焗菠菜大啡菇
同字面一樣啦大菇中間夾咗菠菜蓉再面頭加mozzarella去焗
味道… 淡咗啲
可能因為菇出水太多啩
咁個菠菜蓉又冇話俾好濃味落去
Mozzarella又係淡味芝士嘛
成碟嘢係沙律菜嘅陳醋醬最濃味
(之後嘅主菜們都有佢嘅身影)
主菜之一嗌咗尋日的羔羊
(香煎澳州法式小羊架配脆薯條)
叫五成熟切落去似三成熟
但個羊本身都OK新鮮
有羊味唔會羶都咬得開
如果真 • 五成熟會更OK
配醬有提鮮嘅法式芥末同濃郁薄荷醬唔錯呀
薯條夠熱又夠硬脆,正!
另一主菜係慢落豬
(慢煮西班牙黑毛豬串燒配甜蕃薯角)
以55°C慢煮一粒鐘後再焗
肉嫩汁多豬味濃
焗過嘅紅黃綠椒非常甜
三串豬之中有一片香葉因此有兩舊豬極級香
個蕃薯角一啲都唔角
點睇都係條but一啲都唔影響佢嘅美味
又脆又甜幾好食呢
食豬嗰陣已經覺得飽
然而要餵飽個甜品胃嘛…
薩拉熱窩上的羅密歐與謝檸檬
(Lemon in Sarajevo | Limone Ripieno)
原個義大利檸檬嘅雪葩
為求想知係咪真檸檬我仲咬咗個檸檬皮殼兩啖
皮係好清新嘅檸檬味然後苦味 XD
個雪葩都幾酸吓
拎埋啲燒迷你棉花糖食就啱啱好

總括嚟講啲食物質數幾好
服務生都算好好
裝潢唔錯係坐得逼夾啲
雖然佢話晒都係响間酒店裡面
不過又冇酒店嘅舒適度啊
感覺上貴咗少少囉…
(我冇畀錢都覺得貴)

Comments