[麵] 元朗學記粥麵 - 鮮蝦雲吞麵

炒完地鐵話好好人咁俾三日半價喎多謝晒
入去十世都冇去過嘅元朗
行咗大馬路同周邊都冇嘢啱食
熱到hihi咁都係要入返商場
特登嚟唔係食呢度嘢條氣會唔順嘛
反正唔駛等位就食呢間
鮮蝦雲吞麵
lunch set有麵有小食同嘢飲
個麵夠爽冇鹼水味
雲吞有四大粒而蝦都係新鮮彈牙
掛麵湯底唔太鹹
不過都係要加醋去解一解個湯面嘅油膩
炸鯪魚球
Mmm... 我真係好鍾意食鯪魚球㗎
但係呢兜真係真係真係好唔掂
個炸,係炸得幾好
至少熱辣辣同有住薄薄脆口
BUT個魚蛋極度唔得
完!全!唔!彈!牙!
即係呢平時啲魚膠蝦膠喪打就會彈彈彈
而呢個就似打都冇打過齋拆肉攪兩攪就唧做波咁
唉~~~~~~~~~~~
自製薏米水
唔太甜有微微薑味,OK解渴吖

就算係set佢一啲都唔平
唔係賺得多嗰種只係地產商拎嘅成本太高
突然好慶幸我唔係响呢邊生活囉…

By the way, 都係搭返巴士出去!

Comments