百物看世界 - 大英博物館藏品展 (A History of the World in 100 Objects from the British Museum)

雖然文化博物館間唔時都會展出大英博物館嘅展品
不過就係每次都會有唔少嘢令人吸入去
今次借咗101組館藏
標準飛嘅樣係希伯來星盤
童裝先有神奈川沖浪裏呢(残念ですね)
話時話呢本場刊做得幾好
passport size passport樣
細細本好似少啲人轉頭掉咗佢
同埋有唔同位俾人蓋印仔
(啲印仔寫arrival嗰啲唔係有咩特別我就冇特登stamp嚟整花本嘢,同埋有啲印仔响開館一日內已經消失咗)
Outer Coffin of Nesperennub
尼斯柏能納的外棺
約公元前800年當然係埃及產物
Mmm... 古埃及棺木甚至木乃伊都展過好多鑊
加上擺放入口處嘛…
超多人呀睇咗棺木啲圖案一次就唔留戀快步走喇
Egyptian Cosmetic Palette | 埃及化妝調色盤
比棺木更早面世嘅公元前4000-3600年埃及物品
化妝果然係必需品呢!
The Standard of UR | 烏爾軍旗
約公元前2500年伊拉克嘢
係嚟自蘇美爾嘅烏爾城 (Sumerian city of UR)
木盒上面係馬賽克
有阿富汗嘅青金石
波斯灣嘅貝殼仲有黃金同紅色石灰岩
呢一邊係戰爭,有驢仔拉戰車同啲戰俘捲入車底
另一面係和平,有牲畜貨物俾國王又有音樂有酒飲咁
Marble Head of Augustus | 奧古斯都大理石頭像
公元1-40年of course係意大利嘅嘢
阿八月係偉大嘅羅馬帝國第一任皇帝
佢個嘜頭當然係周街都會有啦!
(然而未見到個頭像親身只係見個輪廓嗰陣我响度講「哇!有靚仔!」卡卡卡)
Warrior Helmet | 武士頭盔
公元前500-公元700年哥倫比亞貨仔
呢個頭盔混合咗金銀銅嘅合金(通巴加)而成
but黃金係軟嘢,打仗嗰陣係完全保護唔到個頭
所以舊嘢只係拎嚟俾人睇到佢有幾威㗎啫

隔離嗰件係中國青銅鎛
夏商周時期已經有,呢件係約公元前600-400年
用嚟叮叮叮叮玩音樂嘅~
Ceremonial Ballgame Belt | 儀式用球賽腰帶
公元100-500年from墨西哥Veracruz
唔係殺人放火金腰帶,係似拳賽腰帶嗰啲咁
用石造加上大蟾蜍造型
Hoxne Pepper Pot | 霍克森胡椒瓶
350-400年响英國霍克森出土
呢個羅馬貴婦個腦肯肯定唔係裝屎嘅
因為佢係個胡椒罌(仲有得控制出椒量)
英國地窖搵到一個裝印度胡椒嘅罌
真係千山萬水呢…
Maya Altar | 瑪雅祭壇
約763-822年洪都拉斯科潘出土
石灰岩祭壇,個樣叫撒希Sak Siiw
寓意白色恐懼嘅冥界表現
Double-headed Boundary Marker | 雙頭界石
約1600-1800年嚟自智利Rapa Nui
熟口熟面嘅復活島摩埃係咪?
梗係啦!Rapa Nui咪就係復活島囉哈哈哈
Reliquary Casket Showing the Three Magi
東方三王聖物櫃
1200-1230年嚟自法國Limoges嘅
銅製鍍金琺瑯,用嚟裝聖人呀殉道者啲遺物遺骨咁
都話教會鬼死咁多錢㗎啦!
Lewis Chessman | 路易斯島棋子
約1150-1175年响路易斯島搵到(可能係响挪威造嘅)
棋我就唔識捉不過佢哋眼凸凸咁個樣好搞笑
用海象牙造嘅一set 78件
右後嘅think face深思熟慮樣嘅係皇后
因為嗰時做國王嘅老婆係做埋「國王嘅顧問」咁緊要嘅公職啊!
Japanese Samurai Blade | 日本武士刀
1200-1250年of course from日本
鋼刀一把,隔住塊玻璃嚟望都覺得有啲殺氣
(長刀斬人用;短刀先用嚟切腹呢~)
Hebrew Astrolabe | 希伯來星盤
1345-1355年嘅應該係西班牙嘅嘢喎
係當時最先進嘅儀器
可以報時、航海、測緯度同星占
個盤同時係基督教、猶太教同伊斯蘭教撈埋一齊嘅傑作
(有幾塊片可以換嚟睇唔同嘅嘢)
而眼前呢個盤上嘅西班牙同阿拉伯字都係用希伯來文寫嘅
所以推斷個物主可能係猶太學者
Albrecht Dürer's Rhinoceros | 杜勒《犀牛圖》
1515年,德國紐倫堡嘅紙本木刻版畫
超級勁!條友見都未見過呢種犀牛
只係靠草圖同文字記錄就畫到呢隻象真度超高嘅印度犀牛
搵到食吖佢成世人總共賣出咗四五千張犀牛圖!
Double-sided Cameo | 雙面浮雕寶石
1500-1600年,嚟自意大利
縞瑪瑙 x 黃金 x 紅寶石 x 鑽石
咁靚嘅嘢係送俾教宗Clement VII嘅
Benin Plaque | 貝寧銅板
1500-1600年from尼日利亞貝寧
16世紀末強大嘅貝寧王國產物
Fifty Manillas | 五十枚「曼尼拉」貨幣
約1500-1800年尼日利亞出土
Manillas即係葡萄牙文"手鈪"嘅意思
西非人就用佢哋嚟炫富同當錢駛
而响16世紀,呢50隻手鈪就係一個非洲奴隸嘅公價
Four Shadow Puppets from Java | 四個爪哇皮影戲偶
約1800年印尼爪哇出品
水牛皮造,點極都點唔明仲可以慢慢同你講故仔
Compound Microscope | 複合顯微鏡
約1650-1700年荷蘭嘢
當時可以用肉眼睇到嘅新世界
而家睇就覺得個顯微鏡本身都靚到成件藝術品咁!
用紙啦羊皮紙啦皮革啦桃花心木啦金葉同玻璃砌埋㗎喎
家下啲lab點會用呢啲呀?
Hokusai's Under the Wave off Kanagawa (The Great Wave) 
《神奈川沖浪裏》by葛飾北齋
1831年日本木刻版畫
YES!我就係為咗呢幅真跡而早早入場(握拳)
之前冇認真仔細研究過
見到佢嗰陣第一時間就驚嘆:乜原來幅畫咁細幅㗎咋?!
(唯有張條頸伸長啲去睇)
好彩早去早入場箭步飛過嚟睇
所以可以"獨享"咗幅畫好耐(心)

呢幅畫嘅藍色、顏色、構圖等...
只可以講「一定要嚟睇真跡!」

然後就係...
好想去神奈川睇富士山啊!
Hockney's The Beginning | 《開始》霍克尼
1966年英國紙本蝕刻版畫
同性戀合法化,一個良心時代嘅開始...
One Hundred Quintillion Pengő Banknote | 一垓匈牙利辨戈紙幣
1946年6月3日@匈牙利布達佩斯
垓 = 100,000,000,000,000,000,000
係史上發行過最大面積嘅紙幣
二戰後嘅產物,不過呢隻錢已經响同年被取締
Ship's Chronometer from HMS Beagle | 英國皇家海軍「小獵犬號」的航海時計
1795-1805年嘅英國倫敦嘢
呢隻小獵犬就係載達爾文遊歷世界國地嘅船
佢仲因為呢次旅程啟導咗佢嘅進化論呢~
Fiel Dos Santos' Mothers | 《母親》菲爾 · 多斯 · 桑托斯
2011年,Maputo Mozambique
個女人像本身由1976-1992年莫桑比亞內戰後被註銷其武器組成
然後因應主教Dom Dinis Sengulane响1995年嘅「武器交換工具計劃」而創作
跟住就下而家見到由四個藝術家將啲槍拆開再重組成為呢件藝術品

PEACE, NO WAR.
睇完博物館藏品仲有另一特備節目嘅館
冇藏品只係用嚟俾人影吓相同俾小朋友玩吓嗰啲咁...


好值得入去睇啊!(推推推推推)
不過記得要好好愛護藏品
唔!好!摸!同埋千祈千祈唔好用閃!光!燈!
咁樣會好傷佢哋㗎陰功(淚)

Comments