[麵] 勝麵 - 招牌麻辣牛肉撈麵

雖然好鍾意台灣牛肉麵啲香濃湯底
但係咁鬼熱嘅天氣真係唔想蒸住塊面啊...
招牌麻辣牛肉撈麵
托埋塊招牌出嚟
超~ 嫩~ 一嘢就咬得開嘅牛腱
微微川燙過嘅牛肉薄片
兩種濃郁牛肉味中又帶麻辣味
要吸麻辣味當然唔少得蜂巢豆腐
微細窿嘅豆腐,一咬就咇咗微酸麻辣豆味
係嘅,麻辣嘢係唔可以冇鴨血
唔腥又夠韌,麻辣 x 鹵水美妙嘅組合
闊身白麵好掛湯,唔食得辣嘅我叫中辣就啱啱好
韌性足好好好好咬

成碗麵嘅完成度太高喇!正!
叫撈麵會配埋蛋花湯
唔會好鹹又有絲絲滑嘅蛋花
不過習慣港式麵檔撈麵配湯嘅我
都係唔敢將啲湯一飲而盡
滷肉飯
响食麵嘅地方叫飯有時候係會有伏
不過幸運之神今日企响我呢邊
呢碗嘢又幾好食架喎
豬肉粒半肥瘦,滷得入味唔會勁鹹勁甜
油花足同飯食just right
係個汁有少少滿溢
食到碗底啲飯都仲爆汁
(呃,全熟蛋唔係我杯茶)
涼拌手撕無骨鹽水雞
香港限定菜式
雞香滑唔會鹹可以空口食
甜不辣... 甜咗少少不過都唔錯
青瓜爽口碟底嫩豆腐豆味勁濃郁
麻油味都幾出喎,成碟夾埋好似食緊夜市撈一堆咁(嘻)
百香果透心涼愛玉
幾飽都想食嘅甜品
夠!酸!嘅檸檬水真係好正
幾粒仔新鮮百香果已經夠晒香甜
愛玉爽滑骨碌骨碌就跣晒入口


係好完美嘅,可惜飽得滯今次試唔到流心麻糬芋泥雞蛋手工手抓餅
下次一定要去食啊我(握拳)

Comments