村上隆 對戰 村上隆 | MURAKAMI vs MURAKAMI exhibition

襯未俾人整爛同地氈好污糟之前
都係早少少入館睇啦…
經過梵高一役,我死都上網訂飛
反正上網訂抵啲
加上,今日嘅門票騷歐冇即場飛
不過個展擺足兩個月
平日嘅話唔會咁多人去嘅
着好鞋套就一嘢飆上三樓
同一般認知嘅彩色花花唔同
本冇咩介紹嘅場刊係用暗黑系concept
三樓黑色風格入口
呢層有兩個展廳
「分別係宇宙初生的啼聲 The Birth Cry of a Universe」
同「藝術家收藏 The Collection」
當然係先直入宇宙初生的啼聲 The Birth Cry of a Universe
而場中間呢件作品
就係«宇宙初生的啼聲 The Birth Cry of a Universe»
高4.5米,係佢用咗14年時間創作嘅
底座有蓮花中間有妖怪嗰啲仲有河童咁
啲妖怪風格好水木茂,即係畫鬼太郎嗰個啊
呢個場塊地鋪咗深色嘅骷髏頭地氈
感覺上好有踩住一堆骸骨咁(笑)
村上隆同你say hello
簡單介紹返今次嘅策展同「作者的話」
«727 Dragon»
DOB係村上隆第一隻創作品啊
個底勁似雲石但係佢其實係油畫布
紅藍線條下,妖怪悄悄然咁出沒
Tan Tan Bo本身係水木茂筆下嘅人物
亦係村上隆細個嗰陣鍾意嘅角色
同場加埋DOB,一絕!
密集式同色系嘅骷髏骨
同彩骷髏地氈 x 暗黑牆身相輝映
然後入去另一展廳藝術家收藏 The Collection
係村上隆自己揀選其他藝術家嘅私人收藏品
有日本色情攝影師荒木経惟嘅相
«冬日之旅»有佢同佢老婆嘅蜜月相
«傷感之旅»有離別,已逝去嘅生前身後嘅相
不過經過KaoRi件事
我個人係覺得佢係一個徹底嘅仆街,就咁
仲有くらや えみ、蘿莉控畫家高野綾、攝影師Hiromix、插畫家五木田智央嘅作品
同青島千穗嘅 «小小的信念 雞女孩»
角落都唔放過,有三木富雄嘅 «無題»(耳)
(頂!我諗起梵高喇又)
另一邊有熟悉嘅Andy Warhol
同更熟悉嘅舊九龍城 «香港,機場» @1993年
中間係呢個展廳最大型哇一聲橙色工具人仔
佢哋嘅背面係空山基嘅作品啦
畫家國方真秀未嘅«Maho最喜愛的雜錦壽司»
呢個展廳收藏嘅作品太多喇
差啲唔記得自己係嚟睇村上隆 XDD
落返二樓展區:服裝展區
唔止成個波波衫係花
連鞋都係花花~
除咗係用佢自己做model
仲有佢隻狗㗎
呢套好有裏原宿洪七公feel啊…
個老頑童mode太強烈喇,哈
前面同後面都咁開心
除咗花花當然唔可以漏咗DOB
好似腫瘤咁擴散
八爪魚
牆上有稿睇清楚making of㗎
身為日本人梗係要有日本風格
對大腳板超有喜感
再到樓下一樓
白色入口同三樓啱啱就係反差色
呢層有四個區域
分別係Francis Bacon, Tan Tan Studies, Superflat Flower同 Enso
而好明顯我而家係身處Superflat Flower
地氈上面係無重複色嘅花花
每個都有自己嘅冧巴
同三樓一樣,村上隆同你打招呼
傾吓減肥嘢
同驚自己好似佢爸爸咁有腦退化症等
好人性化,絕對唔係一個黐線大叔呀
KaiKai KiKi
密集式KaiKai KiKi
上天下地都是花
充滿歡笑嘅KaiKai KiKi太陽花
應該係全場最佳check in地標
不過其實求其拍埋牆都已經夠靚夠繽紛
大大朵 好好笑
好高大嘅花樣人形呀
個比例係咁
除咗可以席地(氈)而坐
仲有超~ 大~ cushion 坐低慢慢睇片
明明都係花花點解會有畫框框住?
因為佢裡面係有骷髏頭,唔同畫作嚟㗎!
黃色系
& 藍色系
well, 呢個系列唔需要講太多
每一幅都係集體回憶喇啩
等等先… 我冇睇劇場版㗎喎
只係知咩時光機隨意門嗰啲㗎咋
眼花撩亂咁走出呢個展廳
係一堆改完又改嘅稿
每次出品前都會勁修改
@Tan Tan Bo Studies
跟住到Francis Bacon展區
Yes!場刊封面就係佢啊!
最後係Enso 圓相
成個展室由天花到牆身落埋地板都係油晒金色
歡迎你嘅小隆同阿貓都係咁金㗎
梗係有DOB
展覽對話框裡面有講過佢其實初初唔受歡迎
唔緊要吖依家村上隆出咗名
DOB都可以吐氣揚眉喇
隔離展館冇嘅金色太陽花
«一隻依偎著生死秘密的獅子»
條橋呢… 係佢嗰啲色彩絢爛骷髏骨嚟㗎
「圓相」,係可以追溯至日本傳統禪畫
«圓相:香格里拉»金色嘅,2015年作品
«無題» 2018年作品
睇落同«圓相:香格里拉»一樣
都係一個圈同暗藏突起骷髏頭咁
但其實呢幅係銀色嘅
然而成個場地係金色所以一定要行近啲仔細咁睇
個場館係懾人嘅全金
同時又有寧靜嘅感覺真係好神奇
(可能係因為咁啱啲人集中响太陽花嗰邊玩啩)
又上返去三樓
因為想慢慢睇關於佢畫嘅動畫6HP
有片講成個製作過程同啲手稿們
訪客留言簿
Mmm... 眼見都係被淪為啲阿爸阿媽俾佢哋嘅寶貝做畫簿咁囉
出返去,冇排隊入紀念品專賣店呀
响出面影吓KaiKai KiKi咋
話時話佢呢個同大館當代美術館都好襯吓喎
特登㗎?

Comments