[牛] 牛惣居酎屋

牛,牛內臟,仲要係串燒
酒,有啤酒,仲一牆焼酎
Suntory - The Premium Malts
咁Q熱嘅天氣坐低都係嚟杯draft先再睇menu
酸汁牛舌筋 
先响menu嘅酒肴部門搵食送酒
用酸酸醋嘅汁煮牛脷條筋
平日牛脷係肥漏漏
不過一嚟佢係筋,仲用醋煮所以好清爽
牛筋腍但係甘筍係硬嘅
唔似一齊炆咁...
笹焼酎 パンダのまんま
係我懶唔睇日文睇中文,個menu寫「山竹」
我真係以為係山竹mangosteen
然而友人話個樣係熊貓幾得意
個腦又load唔到熊貓同竹嘅密切關係
傻傻的真係覺得「山竹釀」咁過癮
哈哈,係山嘅竹bamboo not山竹啦(日文寫明係笹)
清香嘅味道,雖然25度酒精但唔會一入口就衝酒精味
on rock凍飲好爽㗎
by the way嘅忠告唔飲得嘅就唔好當佢清水咁飲,會醉㗎!
(日本酒有樣比啤酒好啲係唔會/冇咁易宿醉)
繼續送酒小菜:油封咸牛舌尖
麻油味勁濃,而牛舌尖爽到好似海蜇咁
彈彈牙咁加埋超爽脆嘅生蔥絲令個味再爆香
送酒小菜除咗可以揀麻油香嘅嘢
咁濃味嘅又另一層次
牛肝醬配酒盜芝士
酒盜嘛,鹽醃海鮮內臟
所以呢種鹹爽又係嗰種極端地鍾意就鍾意反之亦然
配淡味嘅cream cheese就係爽韌中帶軟滑
而講軟滑仲有香滑嘅牛肝醬
唔會太鹹,係啦有酒盜响隔離咩都唔會太鹹(嘻)
連粉紅胡椒粒一齊食真係連小小臊味都無
得返牛膶嘅香味,正!
飲飲吓焼酎好少會返轉頭入飲返啤
咁做緊promote派送膠杯裝
嗌多杯又有擦擦咭
上次食豬內臟串燒モクモクやきとん都有但冇中獎
擦到三獎呀呢次:杯一隻(哈)
好喇!開始入正題串焼き
wasabi橫膈肌
橫膈膜肉腍軟滑,冇咩油脂所以只剩低重牛肉味
連生磨留有纖維嘅wasabi食,又香又爽
點呀?啱啱先食第一條串燒
邊Q個响呢個時間嗌枝豆㗎!
佢係新鮮好食,食少少係OK嘅...
厚燒牛舌
牛脷控梗係會嗌嘅嘢
厚切間係juicy啦,簡單鹽 x 黑椒燒就已經好好食
牛筋
平時响車仔麵嘅餸料之一
而家拎咗嚟串燒,面頭燒得乾乾身咁好過癮
裡面就好似啫喱咁滑滑漿口,好味呢~
牛心
牛味極濃仲超爽口
輕輕鹽燒再灑少少白胡椒粉辟腥就夠晒
雞翼
又邊個嗌㗎?呢串唔係我叫嘅!!!
雖然個樣同聽隔離枱都有話佢好食
而我冇掂佢只留肚食目標食物
牛骨髓
細細個已經好鍾意去茶樓食蒸牛骨髓
貪佢夠滑骨碌骨碌咁
家陣啲茶樓一般都唔見晒
唯有食串燒嘅慰藉吓心靈啦
好似白子咁嫩滑
骨髓本身唔大味所以呢度係加辣蘿蔔蓉同生細蔥
太美妙喇實在,啦啦啦
牛?
呢串... 冇咩印象㖭...(汗)
舌根
呢串係「根」唔係「筋」
好似食最新鮮嘅肉咁好彈牙
平時食牛脷冇去到呢個咁落嘅位置㗎
牛沙瓜
即係牛嘅第四個胃袋
外皮超脆裡面煙韌好嚼
用韓式醬調味,完全係濃味 x 濃味嘅推進

如果講牛膀串呢通常都係指街邊檔啲凍食版
熱食呢表表者當然係牛雜麵嘅牛雜們其中一款
因此,呢串牛膀都係充滿住熟悉嘅味道
分別就在於佢表面乾爽好多,裡面仍然味道濃郁
新鮮鹽燒銀杏串,當然唔會放過
仲有燒咗就會更甜嘅大蔥
解膩又爽口,GOOD!
牛心管 | 牛肝
白色嘅係牛心管,牛心管即係牛嘅大動脈
非常脆口,仲要係夾住柚子胡椒一齊食真係爽到爆
配茄汁食嘅係牛肝,牛仔膶新鮮冇臊味
因為係小牛嘅關係吧!
牛肺
入口爽口無比,彈牙又軟滑
碎粒粒嘅醬將本身唔濃味嘅牛肺提香
仲有橙色嗰個平時唔會見到食到嘅波波
嗱呢粒就真係精華之中嘅精華,一定要試吓!


即係呢,再次重申唔飲得就真係唔好追酒飲
其實我係仲食!緊!嘢!
但忽然友人走咗去俾咭埋單!
唔係話邊個畀錢嗰種問題
係喂大佬係你响開餐之前講食咩都得冇問題食到你話夠為止
本小姐能吃掉一頭牛!!!
然而最後竟然係得到咁嘅收尾
CLS我直頭嬲到丟低佢响居酎屋頭也不回返屋企

間餐廳啲嘢好食服務又好酒又多款喎
枱同枱之間好親密,同日本放工後飲兩杯嗰啲差唔多窄
除咗友人衰收尾同講嘢好失禮之外
成餐都食得好愉快喔~

Comments