[荷蘭正呀喂!] Day2:Alkmaar(Kaasmarkt) → Amsterdam(Kingsnight)

朝早八點幾已經响火車上(捽眼)
望住一出城市就一定見到嘅一望無際無敵平原景
然後就 hello Alkmaar
逢星期五早上嘅呢度會有好多同路人向同一地方前進
跟住一齊行一定唔會蕩失路
Kaasmuseum Alkmaar
嚟到cheese museum喇,不過唔係入裡面參觀嘅
係等到準時十點响Kaasmarkt嘅表演式芝士拍賣
沿用呢400年一直以嚟嘅「托芝」搬運
堅・Dutch Lady
買手 & 芝士鑑定師會俾周圍嘅人試芝士
(我都分到一碌仔啊!)
仲會托吓啲 "非賣品" 娛賓
去日本就睇吓海鮮拍賣
嚟荷蘭梗係要體驗一次芝士拍賣吖~
今朝除咗粒芝士冇嘢落過肚
見到檔仔有新鮮herring就買嚟風暴吸入
肉質嫰嫰咁又夠油花超好味呢
然後周圍都好多人...
都係快快手搵地方食嘢先 @Hof van Sonoy
Texels Skuumkoppe
諗唔到飲咩好就梗係有咩draft揀咩draft
荷蘭啤唔會唔好飲,佢泡量多聞落甜入口焦糖帶微酸,超夠氣好解渴!
嚟得Alkmaar唔係唔識Old Alkmaar嘅芝士呀?!
咪睇啲芝士們其貌不揚
熟成度唔同,味道都會有好大分別
Scroppino
坐得太舒服就再慢慢嘆返杯甜品酒
檸檬同wodka (vodka)味都勁濃,好飲!
玩完一個上晝就坐返火車返Amsterdam
响Amsterdam好似都有一半時間搭tram
街嘅地面好多人已經劃好位
留嚟聽日King's Day擺檔
聽日係市民唯一一日賣嘢唔駛抽稅
所以孤寒嘅荷蘭guys會將自己啲嘢同idea傾巢而出
(賣少少關子聽日再講)
因為一直都未買到橙tee聽日著
所以要嚟最後防線Albert Cuypmarkt尋寶
嚟呢度一定要食嘅Rudi's Original Stroopwafels
即叫即整大個手掌嘅焦糖餅
新鮮嘅真係好食到癲!
除咗買衫同食sroopwafels
仲去買埋餸今晚屋企煮
雖然冇比利時貴價餐廳嘅咁靚
但係都係新鮮當造嘅白蘆筍係唔會唔買嚟食
仲要平!好!多!喎,有唔乖乖俾錢嘅理由咩?
去完market,再兜一兜入街
嚟呢間芝士呀火腿呀醬料都係揀手貨
自家製有好好味嘅麵包蛋糕嗰啲嘅親切小店Le Salonard買食材
電車嘅站有啲有貼住King's Day不停站
聽日唔好傻傻咁响度等車喇
費事企足一日啦
天氣實在太好,返屋企前响附近行個圈先
屋企隔離有架大風車
咪睇佢咁有歷史感其實用得㗎佢
可惜今日個轉向唔係對住我
Lay's Paprika Flavour
唔知點解荷蘭人好似好鍾意呢隻味
咪買包細細哋嘅試吓囉(遠望)
坐响露台先飲個啤chill吓
Gebrouwen Door Vrouwen Pumpkin Party 
今個荷蘭嘅craft嚟講最怪味嘅一隻啤
有南瓜籽味 x 肉桂味 x 甜味
當然有麥芽嗰啲基本味
所有味撈埋極度唔夾,完全唔知自己飲緊乜...(汗)
Dutch Bargain Nitro Strawberry
有頭先嘅怪南瓜批對比
呢隻士多啤梨奶昔啤好飲得多
係今次荷蘭craft beer trip個人排高位嘅味道
香甜嘅士多啤梨香又有甜奶香味
卻帶有啤酒嘅氣泡咁
同麥芽味又唔會唔夾喎,好好飲啊!
飲住啤酒睇吓運河開閘俾船過
呢啲嘢真係香港唔會見到
等食期間又開多枝
一睇就知有幾期待下次返嚟
所以揀咗呢支好似I'll be back嘅Cinema Brewers I'll be Bock
入口係焦糖同黑麥味,甜甜地之後帶微苦
同屋企人朋友一齊食嘢睇景飲啤酒絕對係樂事
有肝醬風乾腸黑松露芝士濃味軟芝士同酸種麵包乾果硬包們
好豐富?未算!
因為仲有白蘆筍啊!
鮮甜滑滑咁又無渣喎好好食㗎~
Uiltje Pineapple Weizen
哈哈哈真係有菠蘿味嘅菠蘿啤
有菠蘿香蕉同丁香嘅甜味
滑滑泡咁做甜品啤就啱啱好
然後瞓醒覺到日落天黑喇就差唔多落樓!
Kingsnight
聽朝係King's Day(國王日)
所以今晚就會係節前狂歡夜
市中心主要道路堆滿晒出嚟玩玩食食聽歌嘅人
唔單止係行人路,運河上啲船都係人
有得玩有得飲有得食有歌喉好嘅唱歌有DJ打碟
氣氛非常非常熱鬧


嘻嘻哈哈咁玩完之後返去瞓
迎接聽朝嘅King's Day喔~~~

Comments