宇治園 | UJI-EN

喫茶去~
抹茶喫茶去パフェ 抹茶芭菲 Matcha parfait
一杯乜都有嘅甜品
上面插住條唧滿抹茶cream响裡面嘅抹茶繪巻
(哎吔吔唔係抹茶曲奇但係都唔緊要啦)
固定响抹茶味濃郁嘅滑滑軟雪糕度
雪糕上仲灑咗抹茶粉同玄米粒
落啲係一原味白一抹茶綠嘅超煙韌白玉
白玉側跟係同抹茶最夾嘅甜甜煮到起晒沙嘅粒粒红豆蓉
墊住佢哋嘅有玄米早餐脆片
對落嘅係一圈又一圈輕身抹茶cream
配埋中間啲抹茶味濃厚嘅蛋糕就啱曬
最底層係味道濃烈嘅抹茶jelly

成杯嘢就係抹茶抹茶好抹茶咁
吖~ 又出奇地唔會好甜,勁正呢!
抹茶かき氷 宇治金時抹茶刨冰 Matcha shaved ice
熱嘛... 食刨冰好正常
刨冰山上面滲咗滿滿嘅綠茶粉
外配一白一綠嘅白玉同甜甜嘅粒粒紅豆蓉
冰山裡面都藏有紅豆蓉唔怕唔夠食
同埋响甜之上更濃郁係抹茶味嘅抹茶蜜
唔加糖漿只係茶粉 & 冰會超級苦
所以唔好擺埋邊唔試啊!
用南部鐵器裝挑選過嘅茶
好好味,值得慢慢坐嘆多陣
加上服務好好,成段時間心情好愉快喔...

Comments